İctimai Birlik həqiqəti Prezidentə və Birinci Vitse Prezidentə çatdırmaq üçün  Zeynal Nağdəliyevdən kömək istədi...ŞİKAYƏTÇİ

5 Avqust 202411:30

Bir neçə gün bundan öncə “Hüquqları Pozulmuş Məhkumların Müdafiəsi və Maarifləndirilməsi” İctimai Birliyi tərəfindən Prezidentə, Birinci-Vitse Prezidentə,  Prezidentin köməkçilərinə  və Prezident Administrasiyasının şöbə müdirlərinə müraciət  etdiyini bildirən İctimai Birlik,   Prezidentin, bu məsələyə  aidiyyəti olmayan köməkçilərini və  şöbə müdirlərini  narahat etdikləri  üçün bu başdan üzürxahlıq diləməklə yanaşı düşünürlər və ümid edirlər ki, müraciət etdikləri  məmurların içərisindən  bir nəfər məmur  çıxıb bu məlumatı  olduğu kimi Prezidentə və Birinci Vitse Prezidentə çatdıracaqdır !?...  Eyni zamanda olaylarla bağlı  məmurların hər birinə ayrı-ayrılıqda müraciət etmək qərarına gələn İctimai Birliyin, Prezidentin köməkçisi-Ərazi- təşkilat məsələləri  şöbəsinin müdiri Zeynal Nağdəliyevə olan müraciətini olduğu kimi dərc edirik.
Hörmətli Zeynal Nağdəliyev!
​Bir neçə müddətdir ki, Bakı şəhəri Xəzər Rayon Məhkəməsinin sədr və hakiminin qanunla bir araya sığmayan hərəkətləri (hərəkətsizliyi) barədə Prezidentə, Birinci-Vitse Prezidentə, Sizə və aidiyyəti qurumlara olmaqla müraciətlər edirik.Bildiririk ki,Xəzər Rayon Məhkəməsində koorrupsiya, rüşvət tüğyan edir, necə deyərlər ayaq tutub yeriyir. Məhkəmənin sədr və hakimi pulsuz işə baxmırlar, bu bir reallıqdır və danılmaz faktdır.​​​​Bu gün elə bir məhkum və elə bir məhkum ailəsi tapmaq olmaz, desin ki, Xəzər Rayon Məhkəməsində hansısa məhkumun müraciətinə pulsuz baxılmış və HÖKM-ündə müsbət dəyişiklik  edilmişdir. Qətiyyən,belə bir məhkum və məhkum ailəsi  tapmaq olmaz.   ​​​​koorrupsiyanın da, rüşvətin də qarşısının alınmasının bir yolu-yolağı var. Çünki, bu sahədə mübarizə aparan dövlət qurumları var. Eyni zamanda Ölkə başçısı bu barədə mübarizə aparmaq üçün daima öz tapşırıqlarını və tövsiyyələrini verməkdədir.Nəticəsi- həbs edilən yüksək çinli məmurlar göz qabağındadır.
Hörmətli Zeynal Nağdəliyev!
Əgər bir rayon Məhkəməsinin sədr və hakimi sərbəst qərar yaza, hətta katib tərəfindən yazılmış qərarı belə üzündən oxuya bilmirsə bunun bir yolu-yolağı varmı!? Belə bir Məhkəmənin sədr və hakimi cinayət qanununun normasını hansısa vətəndaşın-məhkumun barəsində düzgün tətbiq edə bilərmi!?
Bu barədə kimə müraciət ediriksə deyir hakim müstəqildir! Hakim toxunulmazdır!  Onda bu cür hakimlərə qarşı necə, hansı formada mübarizə aparmaq olar!?  Bizlər neynəməliyik və nə etməliyik!?
Bu barədə, Dövlət başçısına və Birinci Vitse Prezidentə etdiyimiz çoxsaylı müraciətlərin qarşısını alırlar. Yoxsa, ölkə başçısı bu kimi ədalətsizliyə heç vaxtı göz yummaz, biz bunu tam əminliklə deyirik.
Bir daha, bildiririk ki, Bakı şəhəri Xəzər Rayon Məhkəməsinin sədr və hakimi  müstəqil qərar yaza və yaxud da  yazılan qərarı üzündən oxuya bilmir!? Məlum məsələdir ki, oxuyub, yaza bilməyən hakim və sədrin nə  qanunlardan, nə qanunun  təsvirindən, nə də ki,  qanunun dispozisiyasından  başı çıxa bilməz!? Hətta, əlində olan hansısa başqa birisinin  Qərarının  üzünü  köçürə, məhkumların ad familiyalarının yerini də dəyişə bilmir!?
Hörmətli Zeynal Nağdəliyev! 
Xəzər Rayon Məhkəməsinin barəsində yuxarıda qeyd  etdiyim  faktı-subutu  olduğu kimi təqdim edirəm.17-saylı Cəzaçəkmə Müəssisəsində cəza çəkən 19 iyun 1995-ci ildə Bakı şəhərində anadan olmuş və Bakı şəhərində qeydiyyatda olmuş, Bakı şəhərində yaşamış  məhkum Abdullayev Fəqan Böyükağa oğlu  Azərbaycan Respublikası Cinayət Məcəlləsinin 60.1-ci maddəsinin barəsində tətbiq edilməsi ilə bağlı Bakı şəhəri Xəzər  Rayon Məhkəməsinə müraciət etmişdir.
Bakı şəhəri Xəzər Rayon Məhkəməsi isə,  7(003)-821/2024 nömrəli, 14.06.2024-cü il tarixdə çıxarmış olduğu Qərarında bildirir ki, məhkəmə,  10.11.1993-cü ildə Quba şəhərində anadan olmuş, Quba şəhəri Y.Qasımov küçəsi ev 16 ünvanda qeydiyyatda olan, Quba şəhəri H.Hüseynov küçəsi ev 9 ünvanda yaşamış və Azərbaycan Respublikası Cinayət Məcəlləsinin 60-ci maddəsinin  barəsində tətbiq edilməsi ilə bağlı Bakı şəhəri Xəzər  Rayon Məhkəməsinə müraciət etmiş, Abdullayev Fəqan Böyükağa oğlunun müraciətinə baxmışdır.
Təkcə bu fakt , Xəzər Rayon Məhkəməsinin  sədr və hakiminin müstəqil qərar yaza (çıxara) və oxuya  bilmədiyinə subutdur. Əgər  məhkəmənin sədr və hakimi müstəqil  qərar yaza və  yazdığı qərarı oxuya bilsəydi, onda, Quba Rayonunda 1993-cü ildə anadan olmuş məhkumun şəxsiyyəti və  anket məlumatları ilə  Bakı şəhərində 1995-ci ildə doğulmuş Fəqan Abdullayevin şəxsiyyətini,anket məlumatlarını dəyişik salmazdı.
Bundan başqa, bu qərar məhkəmənin sədr və hakiminin məhkumun şəxsi işini, iş materiallarını araşdırmadığına, açığı desək heç məhkumun şəxsi işi  ilə tanış olmadığını subut edir.
Təkcə bu fakt, məhkəmənin hansısa məhkumun qərarının  üzünü köçürdüyündən, elə buna görədə, məhkumların anket məlumatlarını-şəxsiyyətlərini  qarışıq salmasından,  hətta Qərar məhkəmənin katibi tərəfindən yazılmışdırsa belə, hakimin qərarı üzündən oxuya bilmədiyinə əyani  subutdur.  
Bundan başqa, məhkəmənin sədr və hakimi qərarında  qeyd edir ki,“Məhkəmə iclasında (virtual iştirak etmiş) prokuror Paşayev Zamir Zal oğlu çıxış edərək  AR.CM-nin 60-cı maddəsinin tətbiqi ilə əlaqədar  məhkum  Əhədzadə Mütəllim Rəcəbəli oğlu tərəfindən verilmiş ərizənin əsassız olduğundan  təmin edilməməsini məhkəməyə təklif etmişdir ”.
Bu fakt  isə onu deməyə əsas verir ki, məhkəmə Prokurorun da adından yalan danışmışdır  və Prokurorun adından yalan ifadələr yazmışdır. Məhkəmə  iclasında (virtual iştirak edən) Prokuror heç vaxtı, iclasda  virtual iştirak edən məhkum Abdullayev Fəqan Böyükağa oğlu ilə, iclasda iştirak etməyən hansısa məhkum Əhədzadə Mütəllim Rəcəbli oğlunun  şəxsiyyətini və şəxsi məlumatlarını qarışıq sala bilməzdi!?...   Görünür, məhkəmənin sədr və hakimi Prokuroru da öz çirkin əməllərinə şərik etmək istəmişdir. Müdriklər demişdir: “cəhənnəmə gedən özünə yoldaş  axtarar”. ​​İndi bilə bilmirik, hakim Quba Rayonunda anadan olmuş məhkumun və yaxud da məhkum Əhədzadə Mütəllim Rəcəbəli oğlunun, hansının barəsində çıxarılmış qərarın üzünü köçürərkən, məhkumların adlarını dəyiş-düyüş salmışdır.
Hörmətli Zeynal Nağdəliyev!​
Əgər məhkəmənin sədr və hakimi qərar yaza və yazdığı qərarı oxuya bilsəydi məhkumların adlarını, şəxsiyyətlərini, anket məlumatlarını dəyişik salardımı!?   Prokurorun adından yalançı ifadələr yazardımı!? Əlbəttə ki, yox!​
Demək Xəzər Rayon Məhkəməsinin sədr və hakimi müstəqil qərar yazmağı bacarmır,  hətta katibin yazdığı  qərarı belə  üzündən oxuya bilmir!? Onda  deyin görək, Siz,  Xəzər Rayon Məhkəməsinin sədr və hakiminin qanundan başı çıxdığına inanırsınızmı!?   Və yaxud da deyə bilərsinizmi, bu cür sədr və hakim  cinayət qanununun normasını hansısa  məhkumun barəsində düzgün tətbiq edə bilərmi!? 
Hörmətli  Zeynal Nağdəliyev!​
Sizdən Xahiş edirik: ​
Xəzər Rayon Məhkəməsinin sədr və hakiminin qanunla bir araya sığmayan qanunsuz hərəkətləri (hərəkətsizliyi), baş vermiş olaylar barədə Prezidentə və Birinci Vitse Prezidentə  məlumat verməkdə bizə köməklik göstərəsiniz...
Qabaqcadan öz minnətdarlığımızı bildiririk,
Hazırladı:    K.Balaşqızı.​
Redaksiyadan: Müraciətdə adları qeyd olunan şəxslərin də mövqeyini dərc etməyə hazırıq.